आझमगढ : एक तरुण प्रेयसीसोबत हॉटेलमध्ये गेला... जेवल्यानंतर रूममध्येच तिच्यावर गोळीबार केला आणि त्यानतंर स्वत:ही आत्महत्या केल्याचा धक्कादायक प्रकार आझमगढमध्ये उघडकीस आला आहे. जियानपूर जवळील कोतवाली भागात घडलेल्या या घटनेने परिसरात खळबळ उडाली आहे.

दरम्यान, याबाबत मिळालेल्या माहितीनुसार, या प्रियकर-प्रेयसीमध्ये काही कारणाने जोरदार वाद झाले. त्यानंतर प्रियकराने तिच्यावर गोळ्या झाडल्या. स्वत:ला बाथरूममध्ये कोंडून घेत गोळी झाडून आत्महत्या केली. या घटनेची माहिती पोलिसांना मिळताच ते घटनास्थळी दाखल झाले असून, अधिक तपास करत आहेत.

याबाबत मिळालेली माहिती अशी की, जियानपूर कोतवाली भागात राहणाऱ्या विशालचे त्याच भागात राहत असलेल्या एका मुलीवर प्रेम होते. दोघेही एका कॉलेजमध्ये शिकत होते. दोघेही लाटघाटातील एका हॉटेलमध्ये गेले होते. तेव्हा दोघांमध्ये काही कारणावरून वाद झाले. 

संतप्त झालेल्या विशालने प्रेयसीवर गोळी झाडली. यानंतर स्वत:वरही गोळी झाडून घेतली. यात विशालचा मृत्यू झाला तर तरुणी गंभीर जखमी झाली आहे. तिला जिल्हा रुग्णालयात दाखल करण्यात आले आहे. गोळीबाराच्या घटनेनंतर पोलिस आणि फॉरेन्सिक टीम घटनास्थळी दाखल झाली.

या प्रकरणी अतिरिक्त पोलिस अधीक्षक राहुल रुशिया यांनी सांगितलं की, तरुण आणि तरुणीने आधी हॉटेलमध्ये जेवण केले. त्यानंतर तिथेच एक रूम भाड्याने घेतली. दरम्यान, काही वेळातच खोलीत गोळीबाराचा आवाज झाला. या घटनेची माहिती पोलिसांना मिळाल्यानतंर ते घटनास्थळी आले. पोलिसांनी जखमी तरुणीला रुग्णालयात दाखल केले. तर तरुणाचा मृतदेह बाथरूममध्ये आढळून आला. तरुणाचा मृतदेह शवविच्छेदनासाठी पाठवण्यात आला आहे.